შედარებითი სისხლის სამართალის სახელმძღვანელო

გამოიცა ევროპის უნივერსიტეტის სამართლის ინსტიტუტის ახალი სახელმძღვანელო: „შედარებითი სისხლის სამართალი“. მასში მოცემულია შედარებითი სისხლის სამართლის თეორია, ისტორია და მეთოდოლოგია, განხილულია საერთო სამართლის, კონტინენტური და მუსლიმური სამართლის ოჯახების ქვეყნების იურისპრუდენციის საფუძვლები და კოდიფიკაციის თავისებურებები.

წიგნის პრეზენტაცია 2022 წლის 23 ივლისს ევროპის უნივერსიტეტის სამართლის ინსტიტუტის მიერ ორგანიზებულ კონფერენციაზე „საერთაშორისო სამართალი ომის პირისპირ“ განხორციელდა.

შედარებითი სისხლის სამართლის სახელმძღვანელოს გამოცემა მნიშვნელოვანი მოვლენაა ქართული იურიდიული საზოგადოებისათვის, სადაც შედარებითი სამართლებრივი კვლევები ძალიან მწირია. ქართული საზოგადოება არ არის განებივრებული შედარებითი კვლევებით სამართალის მეცნიერებაში, ხოლო რაც შეეხება სისხლის სამართალს, მრავალი წელი გავიდა ცნობილი ფრანგი მეცნიერის ჟან პრადელის მონოგრაფიის - „შედარებითი სისხლის სამართლის“ - ქართული თარგმანის გამოცემიდან, რომელიც საქართველოს უმაღლეს სასწავლებლებში კვლავ ერთადერთ სახელმძღვანელოდ რჩება.

შესაბამისად, ახალი სახელმძღვანელოს შექმნა, სისხლის სამართლის მეცნიერებაში, წინგადადგმული ნაბიჯია. იგი მიზნად ისახავს სამართლის სპეციალობის სტუდენტებისთვის თანამედროვე სახელმწიფოების სისხლის სამართლის ამჟამინდელი მდგომარეობისა და განვითარების ტენდენციების გაცნობას, მათთვის შედარებით-სამართლებრივი ანალიზის უნარების გამომუშავებასა და ქართული სისხლის სამართლის, როგორც მსოფლიოს სამართლებრივი სისტემის ნაწილის, ღრმად გააზრებას. კურსი მოიცავს, ასევე, სისხლის სამართლის სფეროში კომპარატივისტიკის საერთო პრობლემატიკისა და პრაქტიკული ამოცანების გადაჭრის საკითხებს.

სახელმძღვანელო შეიცავს არა მარტო საავტორო ტექსტებსა თუ ლექციების კურსს, არამედ სხვა მასალასაც, რომელიც აუცილებელია საგნის საფუძვლიანი შესწავლისათვის. საუბარია საკანონმდებლო აქტებსა და მათ კომენტარებზე, საზღვარგარეთის ქვეყნებისა და საქართველოს სასამართლო პრაქტიკაზე, კლასიკურ იურიდიულ ტრაქტატებსა და თანამედროვე დოქტრინალურ საკითხებზე, ასევე, ცხრილებსა და სქემებზე, რომლებიც მნიშვნელოვნად გაამარტივებენ რთული და მოცულობითი მასალის შესწავლის პროცესს.

სახელმძღვანელო რეკომენდებულია შემდეგი კურსების შესასწავლად: „შედარებითი სისხლის სამართალი“, „საზღვარგარეთის ქვეყნების სისხლის სამართალი“, „შედარებითი სამართალმცოდნეობა“ და გათვალისწინებულია სტუდენტების, დოქტორანტებისა და უმაღლესი სასწავლებლების სამართლის ფაკულტეტის პროფესორ-მასწავლებლებისთვის.