ღირებულებებზე დაფუძნებული თუ ხელშეკრულებებით შეზღუდული? პოზიტიური ვალდებულებების მნიშვნელობა ევროკავშირის სისხლის სამართალში
2026 წლის 30 მარტს ევროპის უნივერსიტეტის სამართლის ინსტიტუტის ორგანიზებით გაიმართა საჯარო ლექცია თემაზე: „ღირებულებებზე დაფუძნებული თუ ხელშეკრულებებით შეზღუდული? პოზიტიური ვალდებულებების მნიშვნელობა ევროკავშირის სისხლის სამართალში“.
ლექციას უძღვებოდა სორენ ვერდონერი (Søren Verdoner), სისხლის სამართლის პროფესორი ორჰუსის უნივერსიტეტიდან (დანია), რომელმაც აუდიტორიას ევროკავშირის სისხლის სამართლის განვითარების ერთ-ერთი ყველაზე აქტუალური და თეორიულად მნიშვნელოვანი დისკუსია შესთავაზა.
მომხსენებელმა ყურადღება გაამახვილა საკითხზე: უნდა განისაზღვროს თუ არა ევროკავშირის სისხლის სამართლის პოლიტიკა მხოლოდ ხელშეკრულებებით მინიჭებული კომპეტენციების ფარგლებში, თუ იგი ასევე უნდა ეფუძნებოდეს ევროკავშირის ფუნდამენტურ ღირებულებებს და მათ პრაქტიკულ განხორციელებას. ლექციის ფარგლებში განხილულ იქნა პოზიტიური ვალდებულებების კონცეფცია, როგორც სამართლებრივი ინსტრუმენტი, რომელიც შესაძლოა განსაზღვრავდეს ევროკავშირის აქტიურ როლს ღირებულებების დაცვის პროცესში.
დისკუსიის მნიშვნელოვანი ნაწილი დაეთმო კრიტიკულ კითხვას — რამდენად მოქმედებს ევროკავშირი საკუთარი ღირებულებების დაცვისას სისხლის სამართლის სფეროში ხელშეკრულებებით განსაზღვრულ საზღვრებში და ხომ არ სცდება ზოგიერთ შემთხვევაში ამ სამართლებრივ ჩარჩოს.
ღონისძიება ჩატარდა ინტერაქციულ ფორმატში, მონაწილეებს ჰქონდათ შესაძლებლობა დაესვათ კითხვები და ჩართულიყვნენ დისკუსიაში.
ლექციის მსვლელობისას უზრუნველყოფილი იყო თანმიმდევრული თარგმნა.
ევროპის უნივერსიტეტის სამართლის ინსტიტუტი აგრძელებს მსგავსი ტიპის აკადემიური ღონისძიებების ორგანიზებას, რაც მიზნად ისახავს თანამედროვე სამართლებრივი დებატების გაღრმავებას და საერთაშორისო აკადემიური თანამშრომლობის გაძლიერებას.
