რუსეთ-საქართველოს პოლიტიკური დავის სამართლებრივი ფინალი და მისი მნიშვენლობა

2021 წლის 26 იანვარს ევროპის უნივერსიტეტის სამართლის ინსტიტუტის ორგანიზებით გაიმართა საჯარო ონლაინ ლექცია: „რუსეთ-საქართველოს პოლიტიკური დავის სამართლებრივი ფინალი და მისი მნიშვენლობა“.

მომხსენებელი გახლდათ ევროპის უნივერსიტეტის სამართლის ინსტიტუტის მეცნიერ თანამშრომელი, იუსტიციის სამინისტროს ადამიანის უფლებათა საერთაშორისო სასამართლოებში სახელმწიფო წარმომადგენლობის დეპარტამენტის უფროსი 2008-2016 წლებში, რუსეთის საქმის წარმომადგენელი სტრასბურგის სასამართლოში, ევროკავშირის ექსპერტი – ლევან მესხორაძე.

საჯარო ლექციაზე განხილული იქნა რუსეთ-საქართველოს საქმეზე სტრასბურგის სასამართლოს მიერ მიღებული გადაწყვეტილების მნიშვნელობა და მისი შესაძლო სამართლებრივი შედეგები. მომხსენებელმა ისაუბრა რუსეთის მიერ ოკუპირებულ ტერიტორიებზე ადამიანის უფლებების დარღვევის ფაქტებზე, ქართული მხარის მიერ მტკიცებულებების შეგროვების და სამართლებრივი პროცედურების წარმოების შესახებ.

შეგახსენებთ, რომ სტრასბურგის სასამართლოს დიდი პალატის მიერ 21 იანვარს გამოცხადებული გადაწყვეტილების თანახმად, საქართველოს სახელმწიფომ რუსეთის ფედერაციას მოუგო საქმე, რომელიც 2008 წლის აგვისტოს ომს უკავშირდება. სასამართლომ დააკმაყოფილა ქართული მხარის სახელმწიფოთშორის საჩივარში ჩამოთვლილი ყველა ძირითადი მოთხოვნა.

„სასამართლოს დიდმა პალატამ დაადგინა, რომ რუსეთი ახორციელებდა ცხინვალის რეგიონზე და აფხაზეთზე ეფექტურ კონტროლს და აქედან გამომდინარე, მას შეერაცხება პასუხისმგებლობა საქართველოს მოქალაქეების უფლებების დარღვევისათვის“.

ამასთან, ძალზედ მნიშვნელოვანია, რომ სასამართლომ დაადგინა, 2008 წლის ომის დროს რუსეთის მიერ ქართველების ეთნიკური წმენდა.

სტრასბურგის სასამართლოს დიდი პალატის გადაწყვეტილება გასაჩივრებას არ ექვემდებარება.