მოსამართლის პროფესიული ქცევის სტანდარტები
2019 წლის 12 ივნისს, ევროპის უნივერსიტეტში, ამერიკელმა მოსამართლემ მარკ სპეისერმა მასტეკლაი გამართა თემაზე: „მოსამართლის პროფესიული ქცევის სტანდარტები“. ლექციას ევროპის უნივერსიტეტის სტუდენტების გარდა საქართველოს სხვადასხვა უმაღლესი სასწავლებლის სტუდენტები და ქართველი იურისტებიც ესწრებოდნენ. ყურადღება იქნა გამახვილებული მოსამართლის პროფესიული ქცევის მოთხოვნებზე, როგორც საერთაშორისო კუთხით, ასევე აშშ-ს კანონმდებლობის მიხედვით.
მარკ სპაიერს ევროპის უნივერსიტეტის სამართლის ინსტიტუტთან მრავალწლიანი პარტნიორობა აკავშირებს. მას არაერთხელ ჩაუტარებია საჯარო ლექცია და ტრენინგი ინსტიტუტის მოწვევით. მისი ინიციატივით, ევროპის უნივერსიტეტის საუკეთესო სტუდენტმა მაიამის (აშშ) სასამართლოში ერთ თვიანი პრაქტიკა გაიარა.
მასტერკლასი ინგლისურ ენაზე ჩატარდა. გაიცა შესაბამისი სერტიფიკატი.
ვიზიტის ფარგლებში მოხდა შეხვედრა საქართველოს გენერალურ პროკურატურაში. შეხვედრაში გენერალურ პროკურორ ირაკლი შოთაძესთან ერთად, გენერალური პროკურორის მოადგილე ნათია მერებაშვილი და პროკურატურის სტრუქტურული დანაყოფების უფროსები – ირაკლი ჩილინგარაშვილი, ნიკოლოზ ჭინკორაშვილი და მირიან მეგრელიშვილი მონაწილეობდნენ. გენერალურმა პროკურორმა, ირაკლი შოთაძემ, სტუმარს საქართველოს პროკურატურის საქმიანობის მიმართ გამოხატული ინტერესისა და მოსაზრებების გაზიარებისთვის მადლობა გადაუხადა.
როგორც გენერალური პროკურორის მოადგილემ, ნათია მერებაშვილმა განაცხადა, პროკურატურისთვის პრიორიტეტულ საკითხებზე უცხოელი პარტნიორების და კოლეგების აზრის მოსმენა და მათი გამოცდილების გაზიარება მნიშვნელოვანია.
ამერიკელი მოსამართლის, მარკ სპეისერის განცხადებით, საქართველოს პროკურატურის თანამშრომლების ეფექტიანმა მუშაობამ მასზე დიდი შთაბეჭდილება მოახდინა.
