სტრასბურგის ადამიანის უფლებათა საერთაშორისო ინსტიტუტმა სამხრეთ კავკასიაში პირველი ტრენინგ კურსი ჩაატარა
2017 წლის 16-20 ოქტომბერს, ევროპის უნივერსიტეტის სამართლის ინსტიტუტმა სტრასბურგის ადამიანის უფლებათა საერთაშორისო ინსტიტუტს უმასპინძლა, რომელიც გასვლითი ტურით პირველად იმყოფებოდა სამხრეთ კავკასიაში. ღონისძიების საზეიმო გახსნას დაესწრო საფრანგეთის ელჩი საქართველოში - პასკალ მენიე. ასევე საელჩოს კოოპერაციული ატაშეები, საქართველოს პარლამენტის წევრები, აღმარულებელი ხელისუფლების წარმომადგენლები მთავარი პროკურატურიდან და შინაგან საქმეთა სამინისტროდან.
მოწვეულ ლექტორებს შორის იყვნენ: რიკ ლევსონი - ლეიდენის უნივერსიტეტის სამართლის სკოლის პროფესორი (ჰოლანდია), ანტუან მადელენი - ადამიანის უფლებათა საერთაშორისო ფედერაციის დირექტორი, ანტუან კაბორე - მანჩესტერის უნივერსიტეტი, ზუზანა კოვალოვა - გაეროს ლტოლვილთა უმაღლესი კომისარიატის ექსპერტი. მათ ადამიანის უფლებათა საერთაშორისო სტანდარტები გააცნეს მსმენელებს.
მსმენელებს შორის იყვნენ საქართველოს სხვადასხვა უნივერსიტეტის, მათ შორის ევროპის უნივერსიტეტის, ჯიპას, შავი ზღვისა და თბილისის სახელმწიფო უნივერსიტეტის სამართლის ფაკულტეტის სტუდენტები, ომბუდსმენის აპარატის წარმომადგენლები, მოსამართლეები, ადვოკატები და სხვადასხვა სფეროში მოღვაწე სამართალმცოდნეები, როგორც საქართველოდან, ისე თურქეთიდან, უკრაინიდან, სომხეთიდან და აზერბაიჯანიდან. კურსის ბოლოს, პროექტის მონაწილეებს ტესტირება ჩაუტარდათ და შესაბამისი ცოდნის დამადასტურებელი სერტიფიკატები გადაეცათ.
უმაღლესი შეფასება დაიმსახურა თსუ-ს სტუდენტმა ესმა გუმბერიძემ, რომელიც პროექტის გამარჯვებული გახდა. იგი 2018 წელს ერთთვიან სალექციო კურსზე გაემგზავრება სტრასბურგში.
ღონისძიება ევროპის უნივერსიტეტის სამართლის ინსტიტუტის ორგანიზებით განხორციელდა. პროგრამის მხარდამჭერები იყვნენ ევროპის უნივერსიტეტი, საქართველოში საფრანგეთის საელჩო და გაეროს ლტოლვილთა უმაღლესი კომისარიატი.
როგორც საქართველოში სარფანგეთის ელჩმა, პასკალ მენიემ, განაცხადა, სტრასბურგის ადამიანის უფლებათა საერთაშორისო ინსტიტუტი, რომელიც საქართველოს პირველად ეწვია, ძალიან მნიშვნელოვანი ორგანიზაციაა საფრანგეთში:. მან იმედი გამოთქვა, რომ ევროპის უნივერსიტეტთან ამ ინსტიტუტის თანამშრომლობა ნაყოფიერი იქნება.
