კონფერენცია - ქართული კონკურენციის სამართალი და პოლიტიკა ციფრული ეკონომიკის ეპოქაში
2025 წლის 15 თებერვალს ევროპის უნივერსიტეტის სამართლის ინსტიტუტის ორგანიზებით სასტუმრო ქორთიარდ მარიოტში გაიმართა კონფერენცია სახელწოდებით „ქართული კონკურენციის სამართალი და პოლიტიკა ციფრული ეკონომიკის ეპოქაში“.
ღონისძიებას ესწრებეოდნენ ევროპის უნივერსიტეტის აკადემიური პერსონალი, საქართველოს კონკურენციისა და მომხმარებლის დაცვის სააგენტოს წარმომადგენლები და დაინტერესებული პირები.
კონფერენცია ინსტიტუტის მიერ შოთა რუსთაველის სახელმწიფო ფონდში 2023 წლის სამეცნიერო ფუნდამენტური კვლევების გამარჯვებული პროექტის ფინალურ ღონისძიებას წარმოადგენდა. გაიმართა ასევე პროექტის შედეგად შექმნილი წიგნის - „ქართული კონკურენციის სამართალი და პოლიტიკა ციფრული ეკონომიკის ეპოქაში“ პრეზენტაცია.
კონფერენცია გახსნა ინსტიტუტის დირექტორმა და პროექტის ხელმძღვანელმა იოსებ კელენჯერიძემ. მან ისაუბრა პროექტის მიზნებზე და მნიშვნელობაზე. ხაზი გაუსვა იმ გარემოებას, რომ პროექტის შედეგად შეიქმნა ლიტერატურა, რომელიც უმაღლესი საგანმანათლებლო დაწესებულებების სამართლის პროგრამების სილაბუსებში აისახება. აღნიშნული კონკურენციის სამართლის სფეროში არსებულ მწირ ქართულენოვან ლიტერატურის გამდიდრებას შეუწყობს ხელს.
სიტყვით წარსდგნენ პროექტის მეცნიერ თანამშრომლები, წიგნის ავტორები გვანცა ჩადუნელი და გიორგი ფარულავა, საქართველოს კონკურენციისა და მომხმარებლის დაცვის სააგენტოს იურიდიული დეპარტამენტის უფროსი სალომე ქავთარაძე და კომუნიკაციების კომისიის იურიდიული სამმართველოს უფროსი ლევან მაისურაძე. კონფერენციას პარიზიდან ჩაერთო პროექტის უცხოელი კონსულტანტი, პარიზი-პანთეონ-ასასის უნივერსიტეტის სამართლის კვლევითი ცენტრის მეცნიერ თანამშრომელი დანიელ ფერნანდო კინტერო.
კონფერენციის დასასრულს შედგა დისუკუსია.
კომენტარები