ევროპის უნივერსიტეტის სამართლის ინსტიტუტმა 2025 წლის ნოემბერში გამოსცა ინსტიტუტის უმცროსი მეცნიერ თანამშრომლის - მერი ბანცაძის სამეცნიერო კვლევა „ექიმის სახელშეკრულებო პასუხისმგებლობის ფარგლების დადგენა და პაციენტის უფლებები ქართულ-გერმანულ კანონმდებლობაში“.

წიგნი ეძღვნება თანამედროვე სამედიცინო სამართლის ერთ-ერთ უმნიშვნელოვანეს თემას — ექიმის სახელშეკრულებო პასუხისმგებლობას, პაციენტის უფლებებს და მტკიცების ტვირთის განაწილებას სამედიცინო დავებში. კვლევა პასუხობს იმ პრაქტიკულ და თეორიულ კითხვებს, რომლებიც დღემდე გამოწვევად რჩება ქართულ სამართლში, განსაკუთრებით იმის გათვალისწინებით, რომ საქართველოს საკანონმდებლო ბაზაში სამედიცინო მომსახურების ხელშეკრულება პირდაპირ არ არის განმარტებული.

ავტორი დეტალურად იძიებს სამედიცინო მომსახურების ხელშეკრულების არსს და მხარეთა უფლებებს, ექიმის სახელშეკრულებო და დელიქტურ პასუხისმგებლობას, პაციენტის ინფორმირების, თანხმობის, დოკუმენტირების და თანამშრომლობის ვალდებულებებთან დაკავშირებულ სტანდარტებს და პაციენტის უფლებების დაცვის მექანიზმებს და საქართველოში არსებული ნორმების გაუმჯობესების საჭიროებებს.

მონოგრაფია მნიშვნელოვან ყურადღებას უთმობს გერმანული სამართლის გამოცდილებას, რომელიც ავტორის შეფასებით წარმოადგენს საუკეთესო მოდელს ქართული სამედიცინო სამართლის დახვეწისთვის. კვლევაში განხილულია ასევე სასამართლო პრაქტიკის ანალიზი, როგორც ქართული, ასევე გერმანული წყაროებიდან.

მონოგრაფია იქნება მნიშვნელოვანი რესურსი იურიდიული პროფესიის წარმომადგენლებისთვის, სამედიცინო დაწესებულებების მენეჯმენტისთვის, სტუდენტებისა და მკვლევრებისათვის.